Plan Especial de Protección e Rehabilitación do Casco Vello de Cariño

Os Plans Especiais constitúen dentro das figuras de planeamento da Lei 2/2016 do Solo de Galicia, un instrumento de funcionalidade variada, que se caracteriza precisamente pola especificidade dos aspectos que aborda, co seu único teito na expresa prohibición legal de substituír ao Plan Xeral en canto instrumento de ordenación integral do territorio.

O Plan Especial de Protección e Rehabilitación do Casco Vello de Cariño ten un dobre carácter: como Plan de Protección, en canto debe propoñer medidas destinadas a salvagardar o patrimonio cultural, e como Plan de Rehabilitación, en canto debe ordenar e programar actuacións dirixidas a recuperar e impulsar os valores sociais, culturais, económicos, ambientais, edificatorios e funcionais do Casco Vello.

A partir de aquí defínense como eixes orientadores xerais:
– A salvagarda do patrimonio arquitectónico, arqueolóxico, cultural, ambiental e paisaxístico.
– O mantemento do uso residencial e o impulso á actividade económica.
– A mellora das condicións de vida, evitando o deterioro da zona.
– A integración da zona no contexto funcional da Vila de Cariño e do seu territorio circundante.

Para poder abordar estes eixes cun coñecemento do medio sobre o que se traballa, elaborouse un documento de información que entre outros datos recolle a información recompilada no traballo de campo desenvolto principalmente entre finais de 2018 e principios de 2019. Neste traballo visitáronse de xeito sistemático todos aqueles inmobles aos que foi posible acceder, tanto locais como vivendas, cumprimentándose fichas e enquisas individualizadas de cada unha das unidades edificatorias.

Nesta páxina podes consultar a información urbanística do conxunto do Casco Vello de Cariño, segundo os apartados que che vaian interesando.

Podes acceder ao documento completo da Información Urbanística nestes enlaces onde atoparás o TEXTO completo e os PLANOS.